பெண்களுக்கு எதிரான பாலியல் வழக்குகள் 2 மாதங்களில் முடிக்கப்பட வேண்டும்! சென்னை உயர் நீதிமன்றம் அதிரடி உத்தரவு!

சென்னை: பெண்களுக்கு எதிரான பாலியல் குற்றங்கள் தொடர்பான வழக்குகளை 2 மாதங்களுக்குள் முடிக்க அனைத்து முதன்மை அமர்வு நீதிமன்றங்களும் மற்றும் பெண்களுக்கான சிறப்பு நீதிமன்றங்களும் தீவிர நடவடிக்கை எடுக்க வேண்டும் எனச் சென்னை உயர் நீதிமன்றம் அதிரடி உத்தரவைப் பிறப்பித்துள்ளது.

வழக்கின் பின்னணி:

திருவண்ணாமலைக்கு வழிபாட்டிற்காக வந்த ஆந்திர மாநிலத்தைச் சேர்ந்த பெண் ஒருவர், காவல் துறையைச் சேர்ந்த சுந்தர் மற்றும் சுரேஷ் ராஜ் என்பவர்களால் பாலியல் வன்கொடுமை செய்யப்பட்டதாகத் திருவண்ணாமலை கிழக்கு காவல் நிலையத்தில் வழக்கு பதிவு செய்யப்பட்டது.

இந்த வழக்கின் விசாரணையை விரைவுபடுத்தக் கோரியும், மாநிலத்தில் நிலுவையில் உள்ள பாலியல் குற்ற வழக்குகள் குறித்த விவரங்களை வெளியிடக் கோரியும் பாதிக்கப்பட்ட பெண் சார்பில் சென்னை உயர் நீதிமன்றத்தில் பொதுநல வழக்கு (PIL) தொடரப்பட்டது.

உயர் நீதிமன்ற அமர்வின் முக்கிய உத்தரவுகள்:

தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள் முருகன் ஆகியோர் அடங்கிய அமர்வு முன் இவ்வழக்கு விசாரணைக்கு வந்தது. வழக்கை விசாரித்த நீதிபதிகள் பிறப்பித்த முக்கிய உத்தரவுகள்:

• 2 மாத காலக்கெடு: பெண்களுக்கு எதிரான பாலியல் வன்கொடுமை வழக்குகளை 2 மாதங்களுக்குள் முடிக்குமாறு முதன்மை அமர்வு நீதிமன்றங்கள் மற்றும் சிறப்பு நீதிமன்றங்களுக்கு அறிவுறுத்தப்பட்டுள்ளது.

• போக்சோ (POCSO) வழக்குகள்:

  • வழக்கு விசாரணைக்கு ஏற்ற 30 நாட்களுக்குள் பாதிக்கப்பட்ட குழந்தையின் வாக்குமூலத்தைப் பதிவு செய்ய வேண்டும்.

  • மொத்த வழக்கையும் 1 ஆண்டிற்குள் விசாரித்து முடிக்க வேண்டும்.

• காவல் துறைக்குக் கடும் அறிவுறுத்தல்: பெண்களைப் பாதுகாக்க வேண்டிய காவல்துறையினரே குற்றச் செயல்களில் ஈடுபடுவதைத் தடுக்க வேண்டும். காவல் அதிகாரத்தைத் தவறாகப் பயன்படுத்துவதைத் தவிர்க்க இரவு நேர ரோந்துப் பணிகளைப் மாநிலக் காவல் துறைத் தலைவர் (DGP) ஆண்டுதோறும் ஆய்வு செய்ய வேண்டும்.

• சிறப்புப் பணிக்குழு அமைப்பு: போக்சோ வழக்குகளின் விசாரணையை விரைவுபடுத்த அனைத்து மாவட்டங்களிலும் சிறப்புப் பணிக்குழுக்களை (Special Task Forces) அமைக்க DGP-க்கு உத்தரவிடப்பட்டுள்ளது.

நீதிமன்றக் கட்டமைப்பு சீரமைப்பு:

தேவையற்ற காரணங்களுக்காக வழக்கு விசாரணையை ஒத்திவைக்கக் கூடாது என அனைத்து நீதிமன்றங்களுக்கும் சுற்றறிக்கை அனுப்பப் பதிவாளர் ஜெனரலுக்கு உத்தரவிடப்பட்டுள்ளது.

மேலும், கடலூர், திண்டுக்கல், மதுரை மற்றும் தூத்துக்குடி ஆகிய இடங்களில் காலியாக உள்ள சிறப்பு போக்சோ நீதிபதி பணியிடங்களை உடனடியாக நிரப்பவும், மாநிலம் முழுவதும் புதிதாக 6 சிறப்பு நீதிமன்றங்களை அமைக்கும் நடைமுறையை விரைவுபடுத்தி, அதுகுறித்த அறிக்கையை 2 மாதங்களில் சமர்ப்பிக்கவும் உயர் நீதிமன்றம் ஆணை பிறப்பித்துள்ளது.