ஹார்முஸ் நீரிணையில் கப்பல்கள் தாக்கப்பட்டால் பாலங்கள் அழிக்கப்படும்: டிரம்ப் எச்சரிக்கை; ஈரான் பதிலடி – உச்சகட்டத்தில் பதற்றம்!
தெஹ்ரான்: ஹார்முஸ் நீரிணையில் (Strait of Hormuz) செல்லும் கப்பல்கள் தாக்கப்பட்டால், ஈரானின் அனல்மின் நிலையங்கள் அல்லது பாலங்கள் அழிக்கப்படும் என்று அமெரிக்க அதிபர் டொனால்ட் டிரம்ப் எச்சரித்துள்ளார். இந்த எச்சரிக்கையால் ஆத்திரமடைந்த ஈரான், தங்களைத் தங்கள் எண்ணெயை விற்கவிடாமல் தடுத்தால், அப்பகுதியிலிருந்து எந்தவொரு நாடும் எண்ணெய் ஏற்றுமதி செய்ய முடியாத நிலை ஏற்படும் என்று பதிலடி கொடுத்துள்ளது
அமெரிக்கா தொடர்ந்து 12-வது நாளாக ஈரான் மீது தாக்குதலை நடத்தி வருவதால், மத்திய கிழக்கில் பதற்றம் உச்சகட்டத்தை எட்டியுள்ளது.
டிரம்பின் எச்சரிக்கையும் ஈரானின் பதிலடியும்: ஹார்முஸ் நீரிணையில் கப்பல் போக்குவரத்துக்கு இடையூறு ஏற்பட்டால், ஈரானில் உள்ள பாலங்கள் மற்றும் மின் நிலையங்கள் மீது தாக்குதல் நடத்தப்படும் என்று அமெரிக்க அதிபர் டொனால்ட் டிரம்ப் ‘ட்ரூத்’ (Truth Social) சமூக வலைதளத்தில் எச்சரித்தார்.
இதற்குப் பதிலளிக்கும் வகையில் ஈரானிய நாடாளுமன்ற சபாநாயகர் தனது ‘எக்ஸ்’ பக்கத்தில் பதிவிட்டுள்ளதாவது:
“இந்தப் பிராந்தியத்தில் எங்களால் எண்ணெய் விற்க முடியாவிட்டால், வேறு யாராலும் விற்க முடியாது. எங்கள் தேசிய பாதுகாப்புக்கு உத்தரவாதம் இல்லையென்றால், இப்பிராந்தியத்தில் உள்ள எந்தவொரு உள்கட்டமைப்பும் பாதுகாப்பாக இருக்காது.
அமெரிக்கப் படைகள் இல்லாத நிலையில் மட்டுமே ஹார்முஸ் நீரிணையில் பாதுகாப்பை உறுதி செய்ய முடியும். போர் தொடங்குவதற்கு முன்பு நிலவிய சூழல் இனி ஹார்முஸ் நீரிணையில் இருக்காது என்பதில் நாங்கள் உறுதியாக இருக்கிறோம்.”
உலகப் பொருளாதாரத்திற்கு ஏற்படும் அச்சுறுத்தல்: கடந்த மூன்று மாதங்களில் ஹார்முஸ் நீரிணையில் 30-க்கும் மேற்பட்ட எண்ணெய் டேங்கர் கப்பல்கள் மீது ஈரான் தாக்குதல் நடத்தியதாக அமெரிக்கா குற்றம் சாட்டியுள்ளது. அதேநேரத்தில், அமெரிக்கா தங்கள் நாட்டின் பாலங்களைத் தாக்கினால், அமெரிக்காவின் நட்பு நாடுகளுக்கான மின்சார விநியோகத்தை முழுமையாக நிறுத்திவிடுவோம் என்று ஈரான் எச்சரித்துள்ளது.
உலகளாவிய எண்ணெய் வர்த்தகத்தில் 20 சதவீதத்திற்கும் அதிகமான கச்சா எண்ணெய் ஹார்முஸ் நீரிணை வழியே கொண்டு செல்லப்படுகிறது. இதனால் அங்கு ஏற்படும் எந்தவொரு மோதலும் சர்வதேச சந்தையில் கச்சா எண்ணெய் விலையை உயர்த்தி, உலகளாவிய பொருளாதார பாதிப்பை ஏற்படுத்தும் என்பதால் உலக நாடுகள் இச்சூழ்நிலையை உன்னிப்பாகக் கவனித்து வருகின்றன.
