ஈரான் இரட்டை வேடம்? ஆங்கிலத்தில் ஒன்று.. பாரசீகத்தில் வேறு ஒன்று! ட்ரம்ப் – ஈரான் போர் நிறுத்தத்தில் வெடித்த சர்ச்சை!

ஈரான் இரட்டை வேடம்? 

தெஹ்ரான்: மத்திய கிழக்கு பிராந்தியத்தில் கடந்த ஒரு மாதமாக நீடித்து வந்த அமெரிக்கா – ஈரான் இடையிலான போர் பதற்றம், இன்று காலை அறிவிக்கப்பட்ட தற்காலிக போர் நிறுத்தத்தால் தணிந்துள்ளது. இருப்பினும், இந்த ஒப்பந்தம் தொடர்பாக ஈரான் வெளியிட்ட அறிக்கையில் உள்ள ‘இரட்டை வேடம்’ தற்போது சர்வதேச அளவில் பெரும் விவாதத்தை ஏற்படுத்தியுள்ளது.

சர்ச்சை என்ன? (ஆங்கிலம் vs பாரசீகம்)

ஈரான் அரசு இந்த போர் நிறுத்தம் குறித்து இரண்டு மொழிகளில் அறிக்கைகளை வெளியிட்டது.

1.பாரசீக மொழி அறிக்கை: இதில், “அமெரிக்கா ஈரானின் யுரேனியம் செறிவூட்டல் திட்டத்தை அங்கீகரிக்க வேண்டும்” என்ற நிபந்தனை மிகத் தெளிவாக இடம்பெற்றுள்ளது.

2.ஆங்கில மொழி அறிக்கை: ஆனால், உலக நாடுகளின் பார்வைக்காக வெளியிடப்பட்ட ஆங்கிலப் பதிப்பில் இந்த ‘யுரேனியம்’ குறித்த நிபந்தனை முழுமையாக நீக்கப்பட்டுள்ளது.

இந்தத் தெளிவான முரண்பாடு, ஈரான் தனது நாட்டு மக்களிடம் ஒரு பிம்பத்தையும், சர்வதேச சமூகத்திடம் வேறு ஒரு பிம்பத்தையும் காட்ட முயற்சிப்பதையே உணர்த்துகிறது.

ஈரானின் 10 அம்சத் திட்டம்:

பாகிஸ்தான் பிரதமர் ஷாபாஸ் ஷெரீப் மற்றும் ராணுவத் தளபதி ஆசிம் முனீர் ஆகியோரின் சமரச முயற்சியால் எட்டப்பட்ட இந்த ஒப்பந்தத்தில் ஈரான் 10 முக்கிய கோரிக்கைகளை முன்வைத்துள்ளது:

• யுரேனியம் செறிவூட்டல் நடவடிக்கைகளை அமெரிக்கா ஏற்க வேண்டும்.

• பொருளாதாரத் தடைகள் முழுமையாக நீக்கப்பட வேண்டும்.

• ஹார்முஸ் நீரிணையில் ஈரானின் கட்டுப்பாடு தொடர வேண்டும்.

• ஈரானுக்கு ஏற்பட்ட பாதிப்புகளுக்கு இழப்பீடு வழங்கப்பட வேண்டும்.

• வளைகுடாப் பிராந்தியத்தில் உள்ள அமெரிக்கப் படைகள் வெளியேற வேண்டும்.

ட்ரம்ப்பின் அதிரடி முடிவு:

தாக்குதலுக்கான காலக்கெடு முடிவடைய இருந்த கடைசி நிமிடத்தில், அதிபர் டொனால்ட் ட்ரம்ப் போர் நிறுத்தத்தை அறிவித்தார். ஈரானின் 10 அம்சத் திட்டத்தை அமெரிக்கா “பரிசீலனை” செய்வதாக மட்டுமே அவர் குறிப்பிட்டுள்ளார். ஈரானின் அணுசக்தித் திட்டத்தை முடக்குவதே தனது இலக்கு என்று கூறிவந்த ட்ரம்ப், ஈரானின் யுரேனியம் செறிவூட்டல் நிபந்தனையை ஏற்பாரா என்பது மிகப்பெரிய கேள்விக்குறியே!

தற்போதைக்கு அடுத்த இரண்டு வாரங்களுக்கு ஹார்முஸ் நீரிணை வழியாகக் கப்பல் போக்குவரத்து தடையின்றி நடைபெறும் என இரு நாடுகளும் உறுதி அளித்துள்ளன.