அமெரிக்காவுடனான தோஹா பேச்சுவார்த்தையை திட்டவட்டமாக நிராகரித்தது ஈரான்!
தெஹ்ரான்: ஈரானுக்கும் அமெரிக்காவுக்கும் இடையே மீண்டும் மோதல் சூழல் உருவாகியுள்ள நிலையில், கத்தார் தலைநகரான தோஹாவில் அமைதிப் பேச்சுவார்த்தைகள் நடைபெறும் என்று அமெரிக்க அதிபர் டொனால்ட் டிரம்ப் அறிவித்திருந்ததை ஈரான் முற்றிலுமாக மறுத்துள்ளது.
டிரம்பின் அறிவிப்பு: அமெரிக்க அதிபர் டொனால்ட் டிரம்ப், “தோஹாவில் ஈரானுடன் பேச்சுவார்த்தைகள் நடைபெறவுள்ளன. ஈரானின் அணு ஆயுதத் திட்டத்தைக் கட்டுப்படுத்துவதே இதன் முக்கிய நோக்கம். அவர்கள் அணு ஆயுத உற்பத்தியை நோக்கிச் செல்வதைத் தடுப்பதே எங்கள் இலக்கு, இதற்கு அவர்கள் ஒப்புக்கொண்டுள்ளனர்” என்று கூறியிருந்தார். மேலும், ஈரான் பேச்சுவார்த்தைக்கு விரும்புவதாகத் தனது ‘ட்ரூத்’ சமூக ஊடகத் தளத்திலும் அவர் குறிப்பிட்டிருந்தார். அமெரிக்காவின் சார்பில் மத்திய கிழக்கிற்கான சிறப்புத் தூதர் ஸ்டீவ் விட்காஃப் மற்றும் டிரம்பின் மருமகன் ஜாரெட் குஷ்னர் ஆகியோர் தோஹாவுக்குப் புறப்பட்டுள்ளதாகவும் தகவல்கள் தெரிவித்தன.
ஈரானின் திட்டவட்டமான மறுப்பு: டொனால்ட் டிரம்பின் இந்த இரண்டு கூற்றுகளையும் ஈரான் திட்டவட்டமாக மறுத்துள்ளது. இது குறித்து ஈரானிய வெளியுறவு அமைச்சகத்தின் செய்தித் தொடர்பாளர் இஸ்மாயில் பாகாய் கூறுகையில், “வரும் நாட்களில் அமெரிக்காவுடன் எந்தவிதமான பேச்சுவார்த்தைக்கும் நாங்கள் தயாராக இல்லை. பேச்சுவார்த்தை நடத்துமாறு யாரும் எங்களை எந்த வகையிலும் கட்டாயப்படுத்த முடியாது,” என்று தெரிவித்தார்.
மோதலின் பின்னணி: இரு நாடுகளுக்கும் இடையே முன்னதாக ஒரு அமைதி ஒப்பந்தம் இருந்தபோதிலும், ஹார்முஸ் நீரிணையில் சரக்குக் கப்பல்களை ஈரான் குறிவைத்ததாகக் குற்றம் சாட்டி அமெரிக்கா அதன் மீது தாக்குதல் நடத்தியது. இதற்குப் பதிலடியாக, பஹ்ரைன் மற்றும் குவைத் போன்ற நாடுகளில் அமைந்துள்ள அமெரிக்க ராணுவத் தளங்களை குறிவைத்து ஈரான் தாக்குதல்களை நடத்தியது.
இஸ்ரேல்-ஈரான் மோதல், செங்கடல் பாதுகாப்புச் சிக்கல்கள் மற்றும் கப்பல் போக்குவரத்தில் ஏற்பட்டுள்ள இடையூறுகள் காரணமாக உலகப் பொருளாதாரம் ஏற்கனவே அழுத்தத்தில் உள்ள நிலையில், அமெரிக்கா பேச்சுவார்த்தை நடக்கும் என்று கூற, ஈரான் அதனை மறுத்துள்ளது சர்வதேச அரங்கில் இப்பேச்சுவார்த்தை உண்மையில் நடைபெறுமா என்ற கேள்வியையும் பதற்றத்தையும் எழுப்பியுள்ளது.
