முதல்வர் விஜய்யின் அதிரடி நடவடிக்கை: தமிழகம் முழுவதும் 1,155 ரவுடிகள் கைது; 2,906 பிடிவாரண்டுகள் நிறைவேற்றம்!
சென்னை: தமிழகம் முழுவதும் சட்டம்-ஒழுங்கைப் பராமரிக்கவும், குற்றச் செயல்களை முன்கூட்டியே தடுக்கும் நடவடிக்கையாகவும், முதல்வர் விஜய் மற்றும் காவல்துறை டிஜிபி மகேஷ் குமார் அகர்வால் ஆகியோரின் உத்தரவின் பேரில் மாநிலம் தழுவிய தீவிர கைது நடவடிக்கை மேற்கொள்ளப்பட்டது.
இந்தச் சிறப்பு நடவடிக்கையானது குறிப்பாகத் தொடர் குற்றவாளிகள், பல்வேறு வழக்குகளில் தொடர்புடைய ரவுடிகள், நிலுவையில் உள்ள கைது வாரண்டுகளுடன் தலைமறைவாக இருப்பவர்கள் மற்றும் சமூக விரோதச் செயல்களில் ஈடுபடுபவர்களைக் குறிவைத்து மேற்கொள்ளப்பட்டது.
7 நாட்களில் 31,000-க்கும் மேற்பட்ட நபர்களிடம் விசாரணை: ஜூலை 15, 2026 முதல் ஜூலை 21, 2026 வரை மாநிலம் முழுவதும் தொடர் கண்காணிப்பு மற்றும் தீவிர கைது நடவடிக்கைகள் மேற்கொள்ளப்பட்டன. இந்தச் சிறப்பு நடவடிக்கையின் போது, ரவுடிகள் மற்றும் ஏற்கனவே காவல் நிலையப் பதிவுகளில் (FIR) அல்லது காவல்துறையின் கண்காணிப்பில் உள்ள குற்றப் பின்னணி கொண்டவர்கள் உட்பட மொத்தம் 31,005 நபர்களிடம் நேரடியாக விசாரணை நடத்தப்பட்டது.
இவர்களில், சட்டவிரோத மற்றும் குற்றச் செயல்களில் தொடர்ந்து ஈடுபடுபவர்களாகக் கண்டறியப்பட்ட 1,155 நபர்கள் உடனடியாகக் கைது செய்யப்பட்டு நீதிமன்றக் காவலில் அடைக்கப்பட்டனர்.
2,906 கைது வாரண்டுகள் நிறைவேற்றம்: இந்த நடவடிக்கையின் போது நீதிமன்றத்தால் பிறப்பிக்கப்பட்ட நிலுவையில் உள்ள வாரண்டுகளை நிறைவேற்றுவதில் காவல்துறை சிறப்பு கவனம் செலுத்தியது. ஜூலை 15 முதல் ஜூலை 21 வரையிலான இந்தக் குறுகிய காலத்தில் மட்டும், பிணையில் வெளிவர முடியாத 2,906 வாரண்டுகள் நிறைவேற்றப்பட்டன. மேலும், நீதிமன்ற வாரண்டுகள் நிலுவையில் இருந்து தலைமறைவாக உள்ள மற்ற குற்றவாளிகளை விரைவாகப் பிடிக்கத் தீவிர தேடுதல் வேட்டைகள் நடைபெற்று வருகின்றன.
ஜாமீன் ரத்து மற்றும் கடுமையான எச்சரிக்கை: வழக்கு விசாரணையின் போது ஜாமீன் அல்லது தனிநபர் பிணையில் விடுவிக்கப்பட்டு, பின்னர் தலைமறைவாகி நீதிமன்றத்தில் ஆஜராகத் தவறிய குற்றவாளிகள் மீது கடுமையான நடவடிக்கை எடுக்கப்பட்டு வருகிறது. இந்த ஆண்டில் இதுவரை, நீதிமன்ற உத்தரவுகளை மீறி நீதிமன்றத்தில் ஆஜராகத் தவறிய குற்றவாளிகள் மீது 384 வழக்குகள் பதிவு செய்யப்பட்டுள்ளன.
ஜாமீனில் விடுவிக்கப்பட்ட பிறகும் குற்றச் செயல்களில் ஈடுபடுபவர்கள் அல்லது ஜாமீன் நிபந்தனைகளை மீறுபவர்களின் ஜாமீனை உடனடியாக ரத்து செய்வதற்கான நடவடிக்கைகள் தொடங்கப்பட்டுள்ளன. இது தொடர்பாகத் தேவையான சட்ட நடவடிக்கைகளை விரைவாக மேற்கொள்ளுமாறு அனைத்து நகரக் காவல் ஆணையர்கள், மாவட்டக் காவல் கண்காணிப்பாளர்கள் மற்றும் சிறப்புப் பிரிவு அதிகாரிகளுக்குத் தமிழகக் காவல் துறைத் தலைமையகம் கடுமையான உத்தரவுகளைப் பிறப்பித்துள்ளது. சட்டம்-ஒழுங்கைப் பராமரிக்கவும் பொதுமக்களின் பாதுகாப்பை உறுதி செய்யவும் தமிழகம் முழுவதும் இத்தகைய கடுமையான நடவடிக்கைகள் தொடரும் என்று காவல்துறைத் தலைமை இயக்குநர் அலுவலகம் வெளியிட்ட செய்திக்குறிப்பில் தெரிவிக்கப்பட்டுள்ளது.
