பீகாரில் ஒரே நாளில் வந்த ரிசல்ட் – தமிழகத்தில் இழுபறி: அரசியல் கட்சிகள் கடும் அதிருப்தி!
சென்னை: தமிழகத்தில் நடந்து முடிந்த சட்டமன்றத் தேர்தலுக்கான இறுதி வாக்குப்பதிவு புள்ளிவிவரங்களை வெளியிடுவதில் இந்தியத் தேர்தல் ஆணையம் காட்டி வரும் தாமதம், அரசியல் வட்டாரத்தில் பெரும் சலசலப்பை ஏற்படுத்தியுள்ளது. அண்டை மாநிலமான பீகாரில் வாக்குப்பதிவு முடிந்த 24 மணி நேரத்திற்குள் அனைத்து விவரங்களும் வெளியிடப்பட்ட நிலையில், தமிழகத்தில் மட்டும் ஏன் இந்தத் தாமதம் என எதிர்க்கட்சிகள் கேள்வி எழுப்பி வருகின்றன.
கடந்த ஏப்ரல் 23-ம் தேதி தமிழகத்தின் 234 தொகுதிகளுக்கும் விறுவிறுப்பாகத் தேர்தல் நடைபெற்றது. அன்று மாலை தற்காலிகமாக 85.15% வாக்குகள் பதிவானதாக அறிவிக்கப்பட்டது. பின்னர் சில நாட்களுக்குப் பிறகு அது 85.10% ஆகக் குறைக்கப்பட்டது. இருப்பினும், ஆண்-பெண் வாரியாகவோ அல்லது மொத்த வாக்காளர் எண்ணிக்கை குறித்த துல்லியமான அதிகாரப்பூர்வ அறிக்கையையோ ஆணையம் இதுவரை வெளியிடவில்லை.
திமுக, அதிமுக போன்ற அனுபவம் வாய்ந்த கட்சிகள் பூத் வாரியான தரவுகளைக் கையில் வைத்திருந்தாலும், நாம் தமிழர் கட்சி மற்றும் தமிழக வெற்றி கழகம் போன்ற கட்சிகள் தபால் வாக்குகள் உள்ளிட்ட முழுமையான இறுதிப் பட்டியலுக்காகக் காத்திருக்கின்றன.
இது குறித்துத் தேர்தல் அதிகாரி ஒருவர் கூறுகையில், “மே 4-ம் தேதி வாக்கு எண்ணிக்கை தொடங்கும் வரை தபால் வாக்குகள் பெறப்படும். சுமார் 6 லட்சம் தபால் வாக்குகள் இருப்பதால், இறுதி எண்ணிக்கையில் சிறிய மாற்றங்கள் ஏற்பட வாய்ப்புள்ளது. அதனால்தான் முழுமையான அறிக்கை வாக்கு எண்ணிக்கை நாளன்று வழங்கப்படும்,” எனத் தெரிவித்தார்.
இருப்பினும், “தரவுகளில் ஏதேனும் குளறுபடிகள் இருப்பது தெரியவந்தால், நாங்கள் சட்ட ரீதியாக நீதிமன்றத்தை அணுகுவோம்” என திமுக அமைப்புச் செயலாளர் ஆர்.எஸ். பாரதி எச்சரிக்கை விடுத்துள்ளார். இதே கருத்தை அதிமுக-வின் மூத்த நிர்வாகி இன்பதுரையும் வலியுறுத்தியுள்ளார்.
